黃又南演戀髮癖角色感壓抑 迷暈張凱娸地上夾硬拖行 (21:05)

文章日期:2023年05月16日

由林嘉欣、衛詩雅、劉俊謙、蔡思韵、黃又南、朱栢康、朱鑑然、胡子彤及陳毅燊等合演的電影《失衡凶間之罪與殺》,將於5月25日上映。

由《樹大招風》金像導演許學文執導的《頭髮》中,除了衛詩雅瞓身演出外,飾演髮型屋老闆的黃又南,開拍前專誠向星級髮型師學藝,而飾演Wet妹的張凱娸(娸娸)有幸享受又南為她洗頭按摩服務,大讚對方手勢好,舒服到睡著。不過她被戲中演戀髮癖的黃又南睇中,並成為「獵物」,娸娸慘遭迷暈兼在地上拖行,連頭髮幾乎被扯斷,最後還被黃又南取笑嫌棄太重。

娸娸對又南說:「我最初睇到劇本話『拖行』嘅時候,都有啲擔心,以為要扯我啲頭髮,原來係拖我對腳。其實已經好小心,又南一下一下咁拖我,不過地板唔平扯到頭髮先會痛。其實你同導演對我非常細心,怕我走光,不停問我Ok嗎?」然後她轉個身,展示背部貼了很多保護墊,她笑說:「我背脊好似Wonder Woman咁,佢哋貼咗好多嘢保護我,驚我割損。」

戲中娸娸在夜場被嘔吐物黐住頭髮,看似核突,其實是荳奶溝消化餅的效果。為整理秀髮,於是到又南的髮型屋找他幫手,娸娸大讚他手勢一流,又南得戚地說:「梗係啦,髮型師係好專業嘅職業,鏡頭前無論洗頭抑或揸較剪,手勢如果錯咗真係會畀人鬧,我真係去跟髮型師學洗頭、吹頭同剪頭髮,上咗幾堂,仲帶假髮返屋企練習,一啲都唔容易,易學難精。」娸娸大表榮幸,說:「最初睇到劇本,真係毛骨悚然,覺得你個角色好恐怖,開工終於見到你真人,原來好Nice,好大反差。」

又南說:「我睇到劇本時好開心,我同許學文導演講未試過演一個性格咁壓抑嘅角色,係一個戀髮癖嘅人,新嘗試,係自己最想做到嘅事。」

(即時娛樂)