田蕊妮（阿田）昨晚演出第8場舞台獨腳戲《大離婚日-妻》，她完成演出後被觀眾掌聲感動落淚，更即場宣布再加場。阿田說︰「因為我哋首演到依家反應都好好，所以我哋有一個人類史上最快嘅重演。由於重演嘅門票差唔多賣晒，咁所以呢，即係我哋依家開咗4場重演，啲飛差唔多賣晒，所以又再加開多2場重重演。」
阿田表示《大》是她一個人演的獨腳戲，因為沒有對手，演出時的所有均由自己控制。她說︰「唯一畀到我最大力量嘅對手就係台下面嘅每一位觀眾，所以你哋每一場嘅反應同埋掌聲，其實係一路喺度支持住我，令到我做得好。好多人話睇完呢個騷之後覺得我係黐線嘅，覺得我好癲，其實我想話，因為你哋好癲，同埋你哋好黐線。」
何韻詩昨晚現身捧場，阿田表示演出期間已聽到她的笑聲。阿詩看完騷後入後台探班，她在社交平台分享與阿田的合照，並留言︰「呢條女太強勁，個舞台功架搞到我呢個有後台恐懼症嘅自閉仔都要自己死死地氣捲咗入後台大大力俾個hug佢！繼續Gooshow啊！有乜留返乜乜先講啦！P.s. 林日曦，你好嘢，引到我而家唔睇埋《夫》都唔得啦！」
