林日曦執導的舞台劇《大離婚日》分夫、妻篇，田蕊妮主演的《大離婚日——妻》上周四（25日）落幕，緊接公映實驗舞台劇映畫《大離婚日——夫》，身在日本的林日曦以錄像形式演出。林日曦今日在社交平台宣布《夫》7度重演，日期為6月18日晚上8時，門票將於明天（6月1日）下午2時公開發售。他說︰「最後機會，絕不加場，只會再重演！」
對於海外觀眾希望能有網上直播場次，林日曦斷言拒絕︰「知道有海外朋友好想睇《夫》和《妻》，過往其實我已經講過無數次，我始終認為我嘅舞台創作只適合喺現場睇。唔係話懶巴閉有錢唔賺，而係我性格唔適合，希望你哋可以諒解我嘅老土。至於有人問點解杜汶澤可以網上睇，好簡單因為佢個老婆係田蕊妮，而田蕊妮......係同我一齊做緊《大離婚日》嘅嗰個女主角，所以... 除非你個老婆咁啱又係田蕊妮... 否則... 與其擺我嘅舞台創作上網俾你哋睇，我寧願我遲下屎忽痕寫過一個全新嘅，直接飛去做俾你哋睇，但真係要等我個屎忽真係好痕先... 其餘喺香港嘅朋友，唔使再問我，呢一秒重重重重重演仲有幾十張，自己上網正途買。」
