林海峰（Jan）日前拍攝銀行廣告，配合拍賣會主題，Jan首次以拍賣官角色登場，廣告其中一幕，營造林海峰站在高空上的巨型拍賣槌上，高呼：「今年只做一件事！」
其中一個拍攝場地為中環一幢大廈25樓天台，為配合後期電腦合成以及製造居高臨下效果，製作團隊在天台上，再搭建10呎高台作拍攝之用。
Jan矯捷在高台爬上爬落，兼氣定神閒講對白還做出跳起動作，熱愛長跑的他果然練得好腳力，跳起著地一刻，步履穩健，但原來表面上從容自若的Jan，卻形容這場戲甚大壓力，他說：「第一場戲就要喺高台跳起，就好似演員拍第一場戲，做親熱戲一樣，好大壓力。」企在高空拍攝廣告，林海峰坦言：「嘩！真係唔係講笑！我𠵱家知道點解小朋友罰企唔驚，因為唔夠高，只要企高小朋友就會驚，我企上高台時真係有啲腳軟。」
