久未推出廣東話團歌的MIRROR，今天（23日）推出跳唱作品《SHEESH》，MV中他們以玩味舞步，配合新歌內容，以表達對歌曲想表達的態度：面對更多不同的聲音，最重要有自己一套，自信地邁步向前，終有一日會成功。
今次歌名用上擬聲詞「SHEESH」，是有什麼意思呢？隊長楊樂文（Lokman）說：「《SHEESH》呢首歌係想講，側邊聽到好多聲音，話你唔掂，點都好，就回應一句『SHEESH』！然後繼續做好自己，邊個人睇小你都好，要對自己有信心，終有一日會成功，會令對方大跌眼鏡。」
令人大跌眼鏡的事跡遠古時代就有，今次《SHEESH》MV就以歷史事例作故事，Lokman說：「古人唔相信人類可以喺天空中飛翔，經常取笑科學家傻，唔踏實，但𠵱家好多飛機，一街都係電腦！」為配合歌曲風格，舞蹈上作出新嘗試，副隊長江𤒹生（AK）說；「今次動作上比較玩味重少少，用一個輕鬆態度應對呢啲事情，就好似好多人畀好多唔同意見你，但最後決定喺自己，打番自己節奏。」
說回《SHEESH》，很多人都愛評頭品足別人，硬將自己一套擺在別人身上，AK也說：「好似我哋以前出道會畀人哋話：『你哋係Dancer唔識唱歌』，但畀人哋標籤咗，係咪就等於我哋就係咁樣？會唔會有方法還擊呢？又或者解釋番我哋狀况呢？《SHEESH》有好深嘅意義，大家一齊反省下。」
外間有很多標籤加諸MIRROR身上，Lokman的看法是：「可能好多人會標籤MIRROR係一個男團，男團應該要點，要學下人哋點點點。《SHEESH》就係講緊，唔好理人哋點睇，做好自己先，答案就交畀人哋答，總之做好自己、做咗自己想做嘅嘢就已經OK。」
今年已是MIRROR成軍第5個年頭，是否已經突破某些標籤與框架？AK表示：「我唔會話我哋𠵱家已經做到，或者達到我哋想做嘅嘢，我哋由《全民造星》走出嚟，大家都疑惑我哋12個得唔得：你哋做歌手？下年就冇啦！我哋𠵱家都堅持到第5年，唔係話我哋𠵱家做得好好，但我哋呢幾年，唔多唔少都有進步，喺呢行係要慢慢Fulfill大家需要，滿足觀眾嘅要求。」
Lokman則覺得用行動去證明是最好的方法，他說：「我哋唔會答你做唔做到，我哋MIRROR繼續做自己，畀信心繼續做，個答案畀觀眾自己答自己。」AK溫馨提示一句：「答案係唔會𠵱家搵得到，不過無論結果係點都好，我哋12個都只不過係鍾意表演嘅小朋友。」
