林盛斌（Bob）昨晚錄影《獎門人Happy Summer感謝祭》時，透露他有份主持的《濠玩夏水禮》收視口碑好，節目有機會年尾時「添食」。Bob說︰「4個仔女睇完節目都話想去玩，暑假我會帶家人出團去個小旅行，老婆之後帶仔女去加拿大探親，我本來好想參與但因工作冇辦法分身。」講到細仔幼稚園畢業，他表示見證第4個孩子完成幼稚園階段感觸良多︰「阿仔有份喺畢業禮上台致辭，我事前親自幫佢訓練口才。我個仔都遺傳到演藝細胞，表情多多所以我早前帶他上黎諾懿、陳敏之嘅親子節目。第一次父子檔演出，佢畀人讚表現好好。」被問到會否再追多個時，Bob笑說︰「仲有第5個？唔好搞呢啲，但張繼聰話睇好我，對我有信心。我答佢好，叫佢一齊生。」
