黃家強與肥媽早前因Beyond已故靈魂人物黃家駒一首遺作而爆出「羅生門事件」，2人連日來隔空各自表述掀起「記憶之戰」。家強解釋錄音帶demo寫有「肥媽」兩字，是關於Beyond的尷尬創作手法，自己沒有跟肥媽講過家駒為她寫歌，認為肥媽被人誤導，並強調「沒有是非只有真理」。肥媽則出示15年前報章，家強當時接受訪問說「作品的歌名是人名，他（黃家駒）當時想作給誰便起那人的名字，其中一個譜是給肥媽瑪利亞，估計當時他們曾傾談合作」。家強之後再於社交網發文解釋，除向前輩肥媽感抱歉外，更希望大家能找到整件事的重點。
肥媽今日出席無綫《中年好聲音2》海選面試時受訪，指事件已告一段落，亦不需要家強道歉。她說︰「證明到我冇講大話就得喇！嗰個經理人打嚟搵我唱歌，我都唔識佢嘅，叫我唱就唱囉，冇錢收嘅。佢（黃家強）話冇講過家駒寫歌畀我，舊報道已證實佢有講過啦，佢都衰咗囉，仲話冇講過。可能件事過咗好耐，佢善忘啦﹗我冇嬲佢，嬲人會有皺紋。我70歲喇，唔想有皺紋，過晒去冇嘢喇！」
