梁釗峰日前出席《錸-DSE圍爐音樂會》，與女子組合「雷同二友」為迎接DSE放榜的考生表演，分享面對壓力時的情緒管理秘技。他們分別在「Re」字後面寫上「spect」和「imagine」鼓勵考生，希望他們多想像、欣賞及接納自己。
釗峰演唱《至少還有你取暖》、《28天》和《問題青年》，席間跳落台到觀眾席唱歌和握手，與考生打成一片。他說︰「你哋依家咩心情？好忐忑？好緊張？我都好緊張，緊張你哋嘅緊張。我今日諗住唔講咁多嘢，擺啲想講嘅嘢喺作品度！係咪好型呢？真心，每首歌嘅內容同意義都好深遠，你哋要嗒真啲，要聽好多次。放榜後，身邊好多人會畀意見，老師、朋友、家人、死黨等等，聽邊個好呢？又或者有人會質疑你嘅想法。我想透過歌詞勸勉大家，確立自己相信嘅事情，別人意見要聽，但要深思熟慮，揀啲自己啱用嘅意見，最重要聆聽自己嘅心聲。」
音樂會後，釗峰說：「剛才見到呢班DSE考生，我有千言萬語，但佢哋一定聽到好多意見，我都替佢哋緊張，呢個時候唔使講啲乜，『陪伴』最重要。只要事先好好計劃，乜嘢結果都有明確方向，放榜就好定檔。我當年諗定最好、最壞同埋中間幾個打算，不過到放榜一刻依然會好緊張。其實攞完成績單，啲同學就各散東西，甚至無再見面，我反而想提大家好好珍惜放榜前與同學嘅見面嘅時光，珍惜呢個緣分。」釗峰說最難忘是訓導主任：「當年我嘅訓導主任好惡，但到放榜嗰日，佢好溫柔咁安慰我，輕輕拍我雙肩打打氣，好窩心好sweet。」他又建議考生沖熱水涼和熱飲紓壓，而放榜前一刻就用力握緊拳頭再放鬆，急救緊張情緒。
