古巨基主理的《I Really Love To Sing》音樂企劃接近最終章，第9首跟應智越（細貓）合唱的《心跳回憶》今日（25日）上架。
基仔透露企劃中每次選歌時，都先徵詢合作歌手意見，之後再與舒文想像歌曲重新編曲後的可能性，這次亦不例外。他說：「細貓話佢好鍾意呢隻歌，我同舒老闆商量男男對唱，咩歌會有化學作用呢？最後的確覺得《心跳回憶》係可以有一個特別男男和音合唱版本。」
提到錄音趣事，基仔指可以3個字形容：「好眼瞓！」他說：「因為好多晚都錄到好夜，所以我要喺度講聲，辛苦晒細貓。因為細貓好努力，我同舒老闆又好襟『磨』，真係唔好意思。」
細貓多謝基仔及舒文，表示因為大家對歌曲有要求，自己亦很開心，他說：「因為我嘅聲線同唱腔都幾獨特，未必個個觀眾都喜歡，所以古sir同舒老闆希望發掘我另一啲聲線，令觀眾容易接受。」基仔再說：「細貓係唱得好，好好，啲音準又係唔使擔心，不過我哋花咗時間去發掘另一種唱腔嘅可能性。」
問到錄音錄了多少個晚上，細貓憶述每一晚錄到很晚，但十分開心，他說：「1個月裏面，一個禮拜平均都2、3日。」基仔聽到立即古sir上身並計數：「有10幾日，有10幾晚，唔好意思真係搞到你。」
細貓表示經過基仔跟舒文調教，發掘出自己的另一面，他說：「後來我再去錄自己歌嘅時候，其他監製都講我進步咗、唔同咗。喺應用聲音方面、演繹方面都唔同，經過舒老闆同古sir教導，對我嚟講上咗好重要一堂，同古sir合作好開心。」
除了發掘了細貓另一面的歌唱技巧，基仔同時亦發掘細貓演戲天分。基仔表示拍MV時，他特意細看細貓演內心戲，他說：「真係呢，你要拍多啲戲，唔好嘥咗你嘅天賦，咁精湛演技。我喺度呼籲各位導演們，如果你哋有戲，真係要留意細貓，佢係好投入，尤其係感情戲上面，大家搵細貓拍戲。」
細貓自言用心了解劇本，他說：「我幻想MV入面呢間屋，係人生嘅一個回憶，𠵱家連睇到嘅機會都冇，再有啲情感投射落去，幻想緊呢間屋，可能係同以前嘅愛人一齊住時候係好快樂，一諗到會冇咗嘅時候，自己嘅情感就湧現。」
除了劇本，他亦細味歌詞：「𠵱家演繹版本相對係釋懷感覺，我代入去個感情未係完全釋懷到。」基仔即說：「喺首歌裏面，一個未釋懷，同另一個釋懷咗嘅人嘅一個balance，即係我同你講：『釋懷啦。』」
