早前完成切除口水腺瘤手術的林子博，昨晚與梁雪瑤合作舉行《子瑤有你音樂之夜》。兩人雖然合作開騷，卻未有合唱，梁雪瑤揚言已約定子博，之後再飛英國找他合唱。她說︰「聽到子博開騷前入院，我都好擔心，因為佢話嚟唔到就我唱晒。我話唔可以冇佢﹗」子博的左耳位置仍貼住紗布，他透露本安排好10月在英國開刀，但擔心自己入院後，一對仔女能否自我照顧、出入無人接載不方便及難到醫院探望。子博續說︰「反正放暑假返香港，就問香港嘅醫生安唔安排到，既唔影響小朋友放假，又有親戚朋友煲吓湯照顧我。不過，原本3個鐘嘅手術最後做咗8個鐘，就嚇親仔女。」
子博將於月尾返英國，擔心傷口屆時是否已愈合。他說︰「我話臉仲好腫，但醫生話埋口情况理想，腫係因為我肥，係水腫。不過，佢都幫我抽咗啲血水出嚟。佢話傷口入面被口水分泌填滿，壓住神經，但急唔嚟，要等傷口慢慢復原。醫生話呢個問題係過渡期，唔使擔心，最緊要唔會面癱、歪口歪面。我一向藐嘴藐舌，面癱埋就真係好乞人憎。」
