許廷鏗（Alfred）早前舉行以「大排檔」為主題的粉絲見面會，《全民造星V》成員Hayson 、宇軒 、Oscar 、Tomy亦有出席。Alfred說︰「我其實好鍾意食大排檔，特別係啲香口嘢食，中式大排檔係圓枱，大家傾計好似方便啲，唔會分太多細Group。今次係第一次同粉絲去大排檔，因為我女歌迷比較多，加上佢哋年紀比較細又溫文，以前都係去咖啡店、唱K，多謝佢哋今次陪我癲，去一個『佬』味比較重嘅派對。」
Alfred表示近年每次為品牌拍廣告時都有不同嘗試，這次「大排檔Fan Meeting」的概念十分新穎，更讓歌迷即席點唱，氣氛熱烈。他說︰「今晚有好多海外粉絲參與，好難得見到有啲年長嘅歌迷，平時少啲喺商場活動見到佢哋，反而有嘢食住、坐吓，氣氛仲好。頭先佢哋即席點唱、揀歌都冇難到我，因為我都好鍾意唱歌。呢晚氣氛好好，歌迷比平時唱得再大聲啲，希望將來都唔好怕醜，喺唔同嘅場合都會放膽『吶喊助威』，因為歌迷練咗咁多年歌藝，應該唔會太差。」
另外，Alfred透露正製作新唱片，聖誕節會開騷。他說︰「聖誕節會開騷唱歷年嘅歌曲，如果到時大家喺香港，就留個期畀我﹗」
