謝安琪（Kay）昨晚（9日）到灣仔出席時裝設計比賽，她表示早前一家四口到澳洲旅行，主要目的是帶16歲兒子張瞻搵大學，她說：「個仔心儀幾間墨爾本運動出名嘅大學，佢好鍾意踢波，之前係港隊青年軍，𠵱家準備考大學，只踢校隊止波癮，其實我冇乜祈求，佢開心健康就夠，諗唔到佢想喺運動方面發展。」
問是否捨得放手，讓兒子到外國留學？謝安琪坦言不捨得，一講就會喊，她說：「佢咁大個仔都未試過同我分開咁耐，我亦從未鬧過佢，我哋經常傾偈，佢係我最好嘅朋友，喺我心目中仍係好純潔好傻豬，但對佢嚟講係好事。」她指老公張繼聰卻很放手，更請假親自安排參觀大學行程，但懷疑老公未必捨得女兒張靖到外國留學。
對於6歲女兒成為廣告寵兒，Kay指女兒於暑假期間接拍多個廣告，收入有6位數字，笑稱有女兒接棒，自己可發展多些興趣，她說：「我覺得個女好享受拍攝過程，趁暑假畀機會佢體驗下，佢好醒，識聽導演指示。」
問女兒是否有興趣入行？Kay則說：「個女未有呢個概念，只係同其他小朋友咁，鍾意影靚相同跳舞，將來佢有呢個意向，我都會支持，但𠵱家言之尚早。」
