蔡思貝、何廣沛、陳嘉慧、吳偉豪等主演的劇集《你好，我的大夫》，昨晚（28日）一集講述娜娜（陳善渝飾）與迅賢（謝東閔飾）、一宇（姚宏遠飾）和敏嫣（周麗欣飾）這兩對受不育問題困擾的夫婦向嘉應（蔡思貝飾）求助，尋找最後的生育希望。為了讓觀眾感受到敏嫣的痛苦，劇組將整個求孕過程近乎完整地拍攝出來。周麗欣坦言拍攝時要衝破心理障礙︰「要喺陌生演員面前、坐喺產檢櫈上真係非常尷尬，更感受到整件事需要幾大勇氣。嗰場戲係難過、絕望、不捨、無奈情緒大集合，一個人瞓喺嗰度，感覺又孤獨又冰冷，當時我真心感到恐懼同害怕。」周麗欣更大讚蔡思貝手勢好︰「我未試過拮針，但嗰場戲要實實在在喺我腿上拮針、點火做艾灸，真係嚇死我。不過，估唔到思貝好果斷，落針快而準，加上有專業註冊中醫在場，所以結果都好舒服。」
