炎明熹（Gigi）的首次個唱《炎明熹Gi-FORCE演唱會》將於下周六（10月7日）開鑼，連日來忙於排練的她今天（30日）收到好消息，6月尾推出的歌曲《Little Magic》繼中文歌曲龍虎榜、新城勁爆流行榜、勁歌金榜後，也登上商台903專業推介冠軍位置，成為她的第一首903專業推介冠軍歌。Gigi說︰「當日收到《Little Magic》呢首歌，有少少擔心歌迷會唔會接納，因為隻歌好少女味，節奏好輕快，同我本身個形象唔太夾，加上我換咗另一種唱腔，驚大家唔認得我把聲。」
首次成為四台冠軍歌得主，Gigi歸功於一班幕後團隊：「要多謝作曲嘅J.Arie、填詞嘅雷暐樂、監製陳考威、編曲Sea Travel，當然仲要多謝公司上下，落力為《Little Magic》宣傳嘅所有同事。」雖然唱少女風作品獲歌迷受落，Gigi對日後會否多唱這類歌有保留︰「我仲係新人，應該嘗試更多唔同嘅曲風，慢慢摸索自己日後嘅歌路，所以唔同嘅曲風同音樂人，我都想嘗試同埋合作，正如嚟緊我嘅演唱會，特別搵咗兩位我好欣賞嘅前輩做嘉賓，兩個都係第一次同台合作，我自己都好緊張，但我相信大家會有驚喜，希望歌迷會喜歡我呢個安排。」
