女團COLLAR成員Marf邱彥筒，昨日推出年度第3首單飛作品《// Undecided //》，今次作品繼續保持勁歌熱舞風格，歌曲以矛盾為題，講述自己拉扯的思想，從而處於矛盾狀態，形成困擾，她說：「相信好多人心中都有呢種困擾，又想又唔想咁，但呢啲矛盾思想係控制唔到，今次首歌會有好多觀眾可以代入，勾起共鳴。」
Marf今年先後推出3首跳唱快歌《*~Silencio…Shh》、《fOoL##》、《// Undecided //》，為爭奪女新人金獎造勢。在3首歌之中，Marf表示《// Undecided //》舞步令她感覺最爽，她說：「聽到Demo時，呢首歌本身係男聲，所以感覺好特別，而且一聽首歌畀到我嘅畫面，已經係好好跳，因為我以往喜歡嘅歌及跳舞，都係特別肉緊類型，聽完Demo後，我就想試下做呢首歌，嘗試挑戰男仔頭少少嘅嘢。」
除了舞步令Marf叫爽，《// Undecided //》MV拍攝，亦以《那年盛夏我們綻放如花》的班底為主，不過最令Marf回味，相信是MV中她與狗狗合作，愛犬之人Marf表示：「今次拍攝都幾多難忘事，MV感覺似Dance version，仲有隻都柏文狗出現，佢陪我拍咗2、3個鐘，可以同狗狗拍攝，好開心。」Marf透露今年還會推出一首歌，依舊勁歌熱舞，以展現她的能量：「下首歌會係本年度全年總結，十分期待，而出年嘅歌曲安排中，會有特別嘗試。」
對於首部擔演劇集《那年盛夏我們綻放如花》，口碑載道，外界更以神劇來形容，Marf聞言感激表示：「好驚喜，好開心大家咁鍾意，呢套劇令所有演員都好開心同好感動，本身冇期望太多，所有嘢都係做咗先算，嚟緊超級想開續集，期待同一個班底，做番同一件事，又或者係更刺激嘅事。」
