歌唱真人騷《中年好聲音2》昨晚（15日）播出一集，繼續是60強淘汰賽，只有30位參賽者可以晉級下一回合。
昨晚一集再有3位5燈選手誕生，分別有冧莊5燈的劉可，另外還有陳麗媚和陳蒨葶。上回合一鳴驚人的劉可獻唱《我》，一開波便大晒功架，先來清唱一小段，之後劉可愈唱愈投入，演唱完畢後更忍不住爆喊。
劉可憑住真摯演出贏得5燈，亦是繼陳俞霏後，第2位冧莊5燈選手！對於劉可的演出，感性的肥媽大讚：「佢清唱嗰段，我幾乎死咗咁滯啦！佢唱到一半我都喊喇，唱歌要投入，感動到自己感動到人，你真係掂到我哋個心。」
來自吉隆坡的陳麗媚獻唱《上海灘龍虎鬥》，以迷人Pink Lady造型上陣的她非常醒神，最終憑激情演出獲5燈，由3燈選手升呢5燈選手！張佳添說：「你冇辜負我第一個撳你燈，比起上次唱快歌，我喺慢歌中聽到你實力喺邊度。」
周國豐亦開口大讚：「副歌部分鏗鏘有力，主歌部分柔情似水！」是集最後一位5燈選手是陳蒨葶，以黑色透視裝上陣的她獻唱《我的心裡沒有他》，她邊唱邊扭身扭勢，滲出陣陣女人味，成功俘虜評審獲得5燈佳績，周國豐說：「你揀啱咗歌，完全係好Fit，成件事係賞心悅目！」
