伍仲衡（Harry）推出首本作品鋼琴集，日前接受許文軒主持的《StarTalk》訪問，Harry說：「對於一個作曲人，一個鍾意彈鋼琴嘅人嚟講，能夠擁有一本自己創作作品嘅鋼琴集，絕對係成就解鎖。其實班Fans成日叫我出琴譜畀佢哋彈，講咗2年幾終於出到！出琴譜之外，仲有張純鋼琴唱片，不過要一模一樣跟番自己寫嗰份譜去灌錄，對我嚟講真係好難，因為我平時彈琴，彈10次有10次都會唔同，我覺得流行曲好玩嘅地方，係可以有好多即興嘢，但錄CD就唔可以太即興，要跟番一樣，所以每首歌錄音時，都起碼彈咗30次以上，好多時彈彈下，又即興彈咗另外一啲嘢，又要重新錄過。」
