身在英國倫敦的方皓玟（小明）將在當地開騷，小明趁開演唱會前，爭取時間跟同處英國的黃偉文（Wyman）飯敘，Wyman在社交平台貼出合照，並直言本身跟小明不算熟絡，2人並未約會過，今年才開始合作。
Wyman寫道：「呢單嘢好笑！先交代一下背景，我同方小姐其實係未約會過嘅，準確啲講，今年先開始合作，工作需要會互通WhatsApp，但頂多因為傾個題材，而交換吓自己對事物嘅一啲價值觀，總之呢絕少閒話家常天南地北。
然後畫面跳到倫敦約食飯，我book咗枱7點3，佢知道之後話早啲得唔得？因為驚唔夠時間傾偈。我當時心諗：係乜嘢令呢位女仕咁樂觀呢？基本上我哋其實係非常之唔算熟嘅，點解佢咁有信心我哋第一次見就會雞啄唔斷呢？
結果我哋真係傾足三粒鐘傾到餐廳閂門，再加揸一個鐘頭車，由East London送佢返 Wembley嘅酒店，全程絕無冷場，真係話唔斷，就唔斷唔斷唔斷唔斷唔斷唔斷唔斷唔斷...結論係，佢睇人應該叻過我睇人。我成世人都睇錯人點解我仲咁信自己呢哈哈哈。」
