台慶劇《叠影狙擊》下周一（6日）晚首播，盧慧敏（Amy）、蔡浩然（Scott）及張凱娸（娸娸）首次拍劇，並要應付大量動作場面，開工前按劇組要求接受連串特別訓練。
舞蹈員出身的蔡浩然被導師按在地上進行深度拉筋時露出痛苦表情，他說：「我跳開舞都覺得好辛苦，原來打架比我想像中複雜好多。我完全明白身邊兩位（盧慧敏、張凱娸）嘅感受，我上完堂返屋企要休息一整日，再用熱水浸腳，條腰勁痛，但我知道娸娸上完堂之後，就連落樓梯都有困難。」娸娸面露尷尬笑容說：「我平時冇做開運動，上完堂之後，我坐低、起身、行樓梯都會發出痛苦嘅聲音。其實係好事，學多樣嘢，做演員需要好好裝備自己。」
Amy在劇中首演奸角：「我喺劇入面經常要用隻腳去同人打，所以主要集中訓練雙腿。原來踢腿用嘅肌肉，同我平日做運動運用嘅肌肉係唔同，真係有排練。其中一位師傅不斷鼓勵我，話冇嘢難到我，我要做第二個楊紫瓊，於是我就會忍住痛同自己講『冇嘢難到我㗎』。」蔡浩然認同：「師傅唔會話『乜你咁渣㗎』，佢哋會不斷同你講『你做到㗎！你唔係要做武打巨星咩？你要做甄子丹』。雖然聽落好搞笑，但對我哋嚟講，係一個好正面嘅鼓勵。」
