Twins早前宣布明年1月的紅館演唱會再加開4場，門票今早開賣並於1小時內售罄。蔡卓妍（Sa）和鍾欣潼（嬌）知道後十分高興，Sa反問︰「吓？係咪真？咁快？當然開心啦！」阿嬌表示︰「我會更努力做好演唱會，依家慢慢減緊磅。」
至於會否再加場，Sa稱要由公司決定，而且不知道紅館仍有沒有檔期。她說︰「如果可以加場，我唔抗拒。呢幾年世界咁多變化，我覺得做到就做啦﹗好難得可以同一班歌迷喺紅館相聚，冇人知世界會變成點，日後係咪可以再開騷。歌迷大個咗，我都大個晒，之後嘅人生又會係點？會唔會突然生BB或有家庭，到時未必可以開演唱會，所以我依家抱住可能係最後嘅諗法去做每件事。」
演唱會頭場是阿嬌生日，她知道不少歌迷想與她慶祝︰「我諗大家到時先算啦，入唔到場就唔好買蛋糕畀我，我哋要做10幾場要好小心保護自己，開騷期間亦唔會喺後台影相，希望減低傳染，萬一喺演唱會期間病咗就麻煩。歌迷留言祝福我就夠啦，唔好破費，唔好買咁多蛋糕，我要keep住靚食唔到，完騷後至可以大吃大喝。」
