MIRROR副隊長江𤒹生（AK）早前與日本歌手高瀨統也合唱日文歌《白愛》，在灌錄之時已想過將歌曲製成廣東話版，最新派台作品《月色》因而誕生。歌曲MV以真人加動畫製作而成，AK突然在鏡頭前落淚的畫面，為MV添上一份哀傷。
AK今年6月時，與高瀨統也合唱日文歌《白愛》，當時AK已有製作廣東話版的打算，AK道：「做日文歌時已經有問高瀨，問佢介唔介意將《白愛》翻譯成廣東話版，當時高瀨好開心，仲話梗係唔介意啦！佢都未試過，當時就已經有推出廣東話版嘅一個諗法。」填詞人Oscar按照高瀨統也《白愛》歌詞，填了廣東話版《月色》歌詞，AK說：「廣東話內容同日文內容大致上冇分別，但又唔可以話完全一樣，只係兩份詞中間有關連。」
按照時序，AK在日本錄好《白愛》歌唱部分時，其實還未有《月色》中文歌詞，就連MV的構思都未有，但既然人在日本，AK錄音翌日，與導演Endy穿梭東京大街小巷，邊聽著《白愛》的Rough Cut，邊拍下零碎片段，他說：「當時對廣東話MV未有太大概念，又啱啱錄起《白愛》，我於是只戴住耳機，聽住rough cut，喺東京漫步。返到香港之後，Endy同Oscar就諗到，不如喺片段加入動畫，再剪輯成為MV，因為冇可能返日本補拍，而且妝頭唔同咗，我哋就搵動畫師幫忙完成呢個MV，用動畫畫個女仔出嚟，等大家睇到呢個真人同動畫之間愛情故事。」
雖然MV未有按應有時序製作，但在東京拍攝時，AK聽著Rough Cut，也被歌曲感動得哭起來，而這個畫面，最終成為畫龍點晴的一幕，為《月色》的MV加添了一份傷感味道。
