影帝梁朝偉今早（19日）激罕現身商台，接受林海峰（Jan）﹑阮子健和盧覓雪主持的《在晴朗的一天出發》訪問，宣傳新戲《金手指》。梁朝偉曾以歌手身分上商台谷歌，相隔多年後再到訪，震撼整個商台。
Jan表示《晴朗》開播至今，從未試過有嘉賓，朝偉是破天荒首位《晴朗》嘉賓。朝偉說：「真係榮幸呀﹗」Jan問道：「係咪第一次咁早做宣傳？」朝偉說：「都應該係呀﹗」
Jan再說：「因為真係好突然，我哋冇做任何宣傳，聽眾冇諗過你會突然間出現。」朝偉回應：「亦冇諗過我會早起身呢﹗」Jan反問：「你唔係慣咗早起身咩？」朝偉接着說：「我以前慣好早起身，『早』人嚟㗎，唔知點解最近變咗『晏』人，（Jan：幾時開始？）1個月前，（Jan：發生乜事？）真係唔知發生乜事，無端端咁。（Jan：有第2啲嘢要做？）唔係呀，你知我個人好情緒化啦﹗（Jan：咁又係﹗我哋電台好震撼。）其實好耐冇嚟，以前成日嚟，好多人好耐冇見。（Jan：吃不消？）唔會呀，幾親切。（Jan：擔心會唔習慣？）唔會，好多都識，唔識就驚啲啦﹗」
