82歲盧海鵬（鵬哥）早前出席藝進同學會周年聚會，同期訓練班同學鄧英敏訪問鵬哥近況，並在他的YouTube頻道節目播映。鵬哥受訪時中氣十足，透露右眼因為糖尿病引致青光眼而失明。他說：「之前因為長期糖尿病，引致隻眼青光眼，後來知道都無得醫了。隻（右）眼盲咗，另一隻就冇事」。
鵬哥現在的生活有規律，每日慢跑一小時，早餐食麵包，下午5時許食碗麵當晚飯，晚上9時睡覺；翌日6時起牀。問鵬哥下個月農曆新年節目安排？他稱沒有打算：「過咩節都係咁，我屋企人全部喺加拿大，剩番我一個喺度；大陸屋企人就死晒，父母兄弟、阿哥阿嫂都死晒。」鄧英敏回應鵬哥喺香港有一班好朋友、一班同學在身邊，陪吓傾吓偈都好。問他會否再拍戲，有沒有戲癮？鵬哥說：「覺得可以做咪做吓囉。有乜戲唔戲癮吖？做戲嘅嘢你撩到就有戲癮，你唔撩就係咁呆呆滯滯囉。」 他溫馨提示一班「老友記」，「大家注意身體健康，咩事都唔使理，唔好強求，有得撈就撈，冇得撈就算，就係咁樣過」。
