佘詩曼今晚壓軸現身《萬千星輝頒獎典禮2023》的紅地氈環節，她表示今天下午4時許從北京飛抵澳門，一落機即趕到會場化妝整頭，雖然這陣子十分頻撲，但開心享受，最希望其主演的劇集《新聞女王》能奪得「最佳劇集」。
有報道指李施嬅原定日內飛美國與男友結婚，但因為無綫今年增設「大灣區最喜愛TVB女主角」，她大有機會得獎，於是改為今晚完騷後即起程赴美。佘詩曼說︰「咁我覺得TVB應該要好多謝佢，咁畀面。我希望每一個提名嘅都有獎攞，開開心心﹗ （佢睇好你。）互相鼓勵啦﹗（個個都睇好你，好似餐飯走唔甩？）一餐飯冇所謂，其實我哋已經食咗好多餐，食飯聚會唔係因為有冇獎，係因為我哋真係拍得好開心，大家已經好熟，好珍惜彼此嘅友誼。（如果今晚你拎埋獎就係破紀錄？）攞咗先算﹗」
