無綫新劇《飛常日誌》昨晚（15日）首播，一眾主演悉數登場，當中更有視帝陳豪客串機場管理局主席一角！
昨晚一集劇情緊湊，一集內出現多件突發事件，包括颱風襲港、導遊遺失旅客護照、大肚婆機上作動、小朋友走失等，幸好中央控制中心值班經理楊尚偉（馬國明飾），航空公司駐機場主管張若玲（蔡思貝飾）、機場客運服務經理呂芷珊（高海寧飾）、機場保安經理（行動）陳杰（洪永城飾）和機場飛行區運作經理李勝祥（徐榮飾）等通力合作，最終將所有問題迎刃而解，從中帶出「機場無小事」中心思想。
劇集另一大賣點是在機場實景拍攝，包括中央控制中心（IAC）、綜合大樓、停機坪等。其中佔地5760平方米的IAC最震撼眼球，當中配備的巨型弧形LED幕牆更是大得誇張，飾演值班IAC經理的馬國明，對於能夠經常在IAC中拍攝大感讚嘆：「入到IAC拍攝嘅第一個感覺係覺得好勁，個Mon好似3個戲院Mon咁大，前面可以坐到大約160個人，而嗰160人後面有張枱，就係畀我劇入面個角色值班經理坐。可以幻想當你坐喺嗰個位時，前面有咁多人再加上有咁大嘅Mon，個Mon仲可以睇到任何資訊，好似航班升降、天氣預告、機場附近交通情况等，可以控制機場所有嘢，嗰種震撼力真係好大，好興奮可以坐到嗰個位！」
馬國明透露今次角色非常專業，事前做足功課，他說：「開拍前監製畀咗啲片我睇，訪問咗一啲喺IAC工作嘅同事，尤其係同我角色一樣嘅值班經理，同埋劇組都好好，事前做咗好多資料搜集。」
馬國明感激香港機場管理局全力協助：「每日都有職員喺度協助拍攝，當我哋演員遇到有問題時，佢哋都可以即時以專業嘅角度解答我哋嘅問題。」講到劇中有不少突發情况，他說：「劇本寫咗好多唔同突發情况，無論係天氣問題、小朋友走失，甚至係乘客掛住買嘢遲咗上機，機場同事都要幫手去處理，所以成日都話『機場無小事』就係呢個原因。之前好多劇都係Focus喺空姐同機師度，但其實要維持機場嘅運作，尤其突發事情，係好靠一班無名英雄處理，希望大家睇完之後，會更了解香港國際機場。」
此外，馬國明、蔡思貝、劉穎鏇（Tiffany）和洪永城，昨晚去到香港國際機場直播宣傳劇集，大談拍攝時的難忘事，馬國明透露拍攝期間，某天被家中愛貓抓傷面部，並留有兩條血痕，馬明笑指被老婆湯洛雯笑指似Hello Kitty：「監製好好，淨係Take我另一邊面。」與馬明有不少對手戲的思貝則笑說：「我哋做對手就辛苦喇，望住佢就好似望住Hello Kitty做戲咁，好Cute！」
劇中飾演空姐的Tiffany則指梳空姐髮髻難度高，在劇中亦有空姐造型的思貝異口同聲表示認同，思貝又謂有向劇中曾做過空姐的蘇可欣請教：「佢真實示範過5分鐘就梳到個頭，我哋望住佢好似會發光咁，覺得好勁！」
