黃建東感冒菌入耳鼻致左耳失聽覺︰好想快啲好番 (13:51)

文章日期:2024年02月08日

黃建東上月在深圳拍攝新劇《黑色月光》時患上感冒,回港看醫生服藥後仍未好轉,更引發鼻竇炎、中耳炎及耳積水,左耳聽覺出現了問題。

他說︰「話說上個月喺深圳拍緊《黑色月光》嘅時候惹到感冒,試過有一晚喺酒店房全晚發燒發冷完全瞓唔到,第二日仲要全日戲都有份,唯有連放lunch都唔食偷時間補眠頂住。返咗香港睇醫生食藥有好轉,但鼻涕同咳都仲有。見到病徵好似慢慢減退緊,點知兩三日前隻左耳突然聽唔到嘢,好似潛咗落水底咁,個耳膜仲有啲脹痛,但係仲要喺深圳拍埋先。好驚聽唔到cue同埋對手講對白,又唔敢話俾人知,係咁用隻右耳嚟聽。」

「深圳一殺青第二朝返香港即刻去睇耳鼻喉專科,原來感冒菌入咗鼻同耳變咗鼻竇炎同中耳炎然後變咗耳積水,醫生要拮穿左耳個耳膜抽番少少積水出嚟,但係個左耳感覺仍然喺水底,同埋仲有好多積水滲緊出嚟。我睇過啲報道話中耳炎如果唔及早醫的話,聽覺有機會會永久受損變成弱聽。冇咗聽覺先發現原來聽唔到嘢係咁辛苦,同世界所有人同事都好似有段距離咁。啲人一講嘢細聲啲我就已經聽唔到,同埋唔知道自己講嘢夠唔夠大聲。好想快啲好番,好想隻左耳快啲聽番嘢。」

(即時娛樂)

 

相關字詞﹕黃建東