菊梓喬（Hana）昨晚（18日）到灣仔為婚紗展擔任活動嘉賓，在台上分享夢想婚禮，她說：「希望可以旅行結婚，婚禮喺戶外進行。」她受訪時直言感情空白「乾旱」多時，渴望愛情，笑稱要找婚姻介紹所尋覓對象：「邊個女仔唔想拍拖？我就嚟乾到裂。」提到傳緋聞的吳卓羲，她即搖頭道：「驚！我想拍拖。」
Hana透露已準備簽約新公司，日內會正式公布，問是否獲很多公司招手？她說：「之前都有傾，但想多方面發展，唔想只係唱歌，我都想拍劇做主持，所以揀咗好可靠嘅公司。」對於早前在內地工作，被網民認錯是姚子羚，她說：「咁靚咩？不過佢瘦過我，唔會唔開心，起碼都認到我似一個藝人，其實唔認得我個樣好正常，但我一開聲，就一定會認得我。」
