去年參加《中年好聲音》的羅啟豪，早前偕曾志偉﹑苗僑偉（三哥）﹑戚美珍（三嫂）和黃洛妍（Janees），到美國拉斯維加斯登台，日前才返港。
啟豪入行短短1年已去過澳門、內地及馬來西亞演出，今次是首次獲邀到亞洲以外地方表演。啟豪在這個私人晚宴唱了3首歌，他說：「雖然自己住過美國唔同城市，但第一次去拉斯維加斯，嗰度有好多有趣景點，比如有個新開嘅半圓型娛樂場館，我因爲時差關係，早上6點鐘起身，見到成個都係熒光幕外牆，竟然變咗啱啱瞓醒嘅巨型emoji樣，喺度又矇眼又打喊露咁，好得意！」
談及是次活動，啟豪說：「聽講今次嘅宴會，係一個有好多年歷史嘅新年慶祝活動，之前因爲疫情而停辦幾年，疫情後今年復辦，非常榮幸有份參與，同埋好驚喜被安排住喺非常舒適同靚嘅酒店。」
講到跟幾位前輩幾天的相處，他說：「好開心曾生、三哥同三嫂帶我同Janees周圍食好嘢、睇當地好出名嘅騷，仲分享好多自己經驗同故事畀我哋聽！」
一向腸胃敏感嘅啟豪，去到當地竟然食物中毒！全靠三哥三嫂旅行藥包內的成藥救急，趕得及演出之前康復，屬不幸中之大幸。
