朱栢康（朱康）昨晚（20日）聯同導演黃綺琳（Norris）出席《填詞L》台北首映會。朱康現身首映時戴墨鏡，原來首映前一晚拍攝新戲時，不慎發生小意外弄傷眼部，他說：「噚晚拍重頭戲，唔小心有異物吹入眼，拍攝嗰陣又唔小心整親隻手，無乜大礙，只係受輕傷，所以今（昨）晚先可以如常嚟到見影迷，加上一早應承Norris出席首映，點都要撐場。」
其實朱康在當地早已有不少影迷，在2019年他曾經憑《金都》角逐金馬影帝，不少觀眾都要求跟他合照，朱康亦有求必應，就連女神林熙蕾也到場支持。
朱康表示今次是他首度參與台灣製作的電影：「今次機會好難得，陣容好強大，幕前有小鮮肉又有老戲骨，大家互相鬥『戲』，每日拍攝都好過癮，但另一方面，今次參演都有啲辛苦同壓力，因為係我第一次全套戲用普通話講對白，係從影而嚟其中一個大嘅挑戰。」
為投入演出，朱康2個月前已到台灣準備，其間未曾回港，他笑言有點思鄉，特別掛念家中的心肝寶貝：「呢晚首映好開心，因為終於可以見到班香港朋友，其實我最掛住就係我屋企隻貓，我開始有啲擔心啲糧係咪唔夠，我托朋友幫手照顧。」
