林志美與盧冠廷昨晚（7日）於維園演出「香港流行文化節2024」，大讚在戶外舉行演唱會氣氛正，兩人輪流唱出多首經典金曲包括《初戀》、《偶遇》、《陪著你走》、《緣盡》等，喚起樂迷集體回憶。
林志美去年11月在中山戶外場地舉行粉絲見面會，自言喜歡在戶外搞活動有較大空間。由於有粉絲投訴她久未開騷，她亦有計劃中：「對上一次開騷已是2015年，我都好想再開騷，正開始物色場地，不一定揀戶外或草地，畢竟這類地方香港選擇不多。」如果稍後開騷，她考慮與新一代歌手Jam歌擦出火花，亦有意邀請黃劍文擔任演唱會嘉賓。
73歲盧冠廷連唱多首金歌，又彈結他，大受樂迷歡迎，可是唱到中途感疲倦，要坐下來才繼續唱。當唱《陪著你走》中段僅唱兩個字，就突然停一停，然後笑笑口自嘲「炒粉」，他說：「唔係樂隊炒粉，係我炒粉，我究竟唱到邊句呢？你哋最鍾意就係睇呢啲。」臨完場他應要求安歌一曲，形容氣氛很好。
完騷後盧冠廷自覺很疲倦，因花很多氣力演出，重提炒粉一事，他解釋太開心所致：「唱現場不時都有呢啲情形，但炒到咁大，成段唔知道自己唱到去邊，就係第一次，難得觀眾喜歡看。」
