鄭秀文（Sammi）自去年因病而休養，小休過後Sammi頻頻更新社交網，發布做運動、學唱歌、學化妝片段，終於等到Sammi復出工作，拍攝最新廣告。Sammi一身Deep V露背戰衣華麗登場，大騷滑溜肌膚，狀態大勇，Sammi需要腳踏7吋高跟鞋，站上2米高台拍攝，與音樂融為一體大騷舞姿，盡顯天后風采。
Sammi坦言為了今次合作下了不少工夫：「真係有好一段時間無正式露面，中間想畀自己休息，推辭好多工作，之前又唔小心整親隻眼，休息咗一段時間。今次因為自己好鍾意呢個牌子，所以接拍呢輯廣告好興奮，專登為訂做好華麗嘅長裙，希望畀到大家眼前一亮感覺。」
Sammi休養期間解鎖化妝新技能，向化妝師Ricky取經，偶爾亦跟YouTuber取經，令一眾粉絲敲碗叫Sammi拍YouTube化妝片！Sammi聞言分享：「化妝睇落好似好簡單，但要化得一手好妝，其實唔容易！以前你見我嘅舞台妝多數個重點係眉毛、眼妝、唇妝，但我開始發覺底妝的重要性，我會花好多時間鑽研點樣化好一個底妝，一個好嘅底妝，仲可以令你望落後生咗，將瑕疵收埋佢。」
