雲浩影（Cloud）近日推出新歌《慢性分手》，MV成為YouTube熱門音樂影片之一。Cloud日前在銅鑼灣行人專用區進行行為藝術宣傳新歌，獨自坐在路中心的藍色梳化上聽歌、看書及歎茶，即使被過百粉絲包圍仍視若無睹，繼續享受自己的小空間，更投入到除鞋跪坐椅上。
1小時的活動結束後，Cloud高呼有趣好玩︰「今日呢個行為藝術，喺鬧市中還原《慢性分手》MV場景，製造一個自己嘅小空間睇書。好玩？幾有趣，喺一個繁華嘅城市裏，感覺只得自己嘅平靜空間。多謝大家陪住我，我本來諗住會睇晒成本書，結果睇唔晒，返去慢慢睇。我之前怕會分心，唔敢同大家Say Hi，原來入咗個世界，係可以，試吓就知，好得意，身邊嘅嘢感覺到係郁緊，自己好似有個罩住嘅空間！」
至於手上的書本，她表示是朋友介紹：「呢本書係講How to be Calm in a Busy World，忙碌世界點樣去活得平靜，亦講咗好多嘢，要思考，喺呢個情况睇呢本書，幾有味道，幾有感覺！聽住自己首歌，幾啱Feel！」談到她在活動期間打呵欠，Cloud笑道：「太舒服啦，做番自己嘛，我平時睇書都會打呵欠㗎！」
