草蜢上周六（25日）到澳門舉行《草蜢金夜狂熱音樂會》，雖然今次演出是酒店VIP的專屬場次，但草蜢對歌單、衣著相當高要求，除了在演出前一晚總綵排，開騷當天中午，與Dancers及樂手商討各項細節，而舞台服裝均是全新添置，務求盡善盡美。
當晚草蜢以節拍強勁快歌登場，包括《三分鐘放縱》、《紅唇的吻》國語版《一路順風》，以及《ABC》國語版《限時專送ABC》，將現場氣氛炒得火熱。之後獻唱國語快歌《寶貝對不起》，蔡一智和蘇志威衝到台下，跟觀眾近距離握手及拍照，而蔡一傑則留在台上，走到台邊觀眾握手，將音樂會氣氛推到頂峰。
除了勁歌連場，當晚三子分別有獨唱環節，蔡一傑獻唱《失樂園》，蘇志威演繹《深淵》，還有蔡一智的《看海的日子》，觀眾同樣聽得陶醉。
蘇志威說：「今晚啲VIP特別熱情，以往都做過好多呢類VIP Show，但今晚係去到一個沸點、爆棚嘅地步。」蔡一傑說：「今晚我就有少少蝦碌，因為台下有講國語嘅朋友，又有講廣東話嘅朋友，所以歌單上兩種語言都有，一時唱廣東話一時唱國語，搞到我有少少錯亂。」蔡一智說：「今日都有新歌帶畀大家，係我寫嘅《Framily》，我見台下觀眾嘅反應都好好。」
除了新歌、還有新衫，蔡一傑說他們事前夾好了「銀」、「紅」兩種顏色，之後各自搜羅戰衣，估不到出來的效果出乎意料地夾：「平日我哋要好勤力行街睇衫，因為大家對顏色各有喜好，又要搵啲衫可以上得舞台，大家都知草蜢啲衫有幾勁，其實今日我哋先見到對方著嘅衫，只係之前夾咗顏色，呢個就係默契。」
除了5月澳門站，草蜢在7月和8月繼續有演出，蔡一傑續說：「7月19同20號，我哋會喺新加坡開兩場演唱會，其實𠵱家都冇分，除咗新加坡，馬來西亞、台灣、香港、國內嘅朋友都會飛嚟睇，草蜢每次開演唱會都係大party。」蘇志威補充說：「仲有我哋8月17日，會喺佛山開演唱會，好多住廣州嘅朋友都應承會過去支持我哋。」
