葛民輝、邵美君、梁祖堯、湯駿業將於8月合作演出風車草黑心喜劇《Di-Dar》。葛民輝時隔10年再演舞台劇，稱當年覺得熱血的人才會參演舞台劇。他說︰「因為條數好難計，個個都話好似大家夾錢打高爾夫球咁，得啖笑，覺得件事好奇怪，不過依家人工已唔卑微。」葛民輝自言演舞台劇經驗不多，難得有人賞識，風車草劇團又是其心目中的名牌，加上彭秀慧盛意拳拳邀請，更特別為他加插情慾線。葛民輝笑道：「我要救番呢個角色，所以決定做，情慾線就係飾演訓導主任嘅邵美君，聽到係喺電影《填詞L》飾演我老婆嗰個大媽，真係幻想唔到佢哋所形容嘅美女。」
邵美君未擔心經常爆肚的葛民輝難以應付：「已經唔怕，因為喺電影已領教過，掌握到佢嘅節奏。我唔恐懼佢爆肚，反而好開心去做呢件事。」梁祖堯與湯駿業負責最初與葛民輝傾故事劇本，梁祖堯指當時是第一次與葛民輝這位元祖級潮人傾偈，十分緊張。他說：「因為非常期望合作會擦出咩火花。」湯駿業稱當時心情戰戰兢兢，擔心對方氣場大。他說：「點知佢完全冇架子，一開始傾，已幫手度埋故仔，分析場口，冇諗過佢思維咁勁，好似本身內置咗一個編劇思維。」
