周吉佩（吉吉）日前（16日）接受譚玉瑛、何基佑及麥皓兒主持的新城節目《QK玉瑛室》訪問時，表示太太黃彥欣（Louise）跟麥皓兒是同屆港姐，他亦因此跟麥皓兒認識多年。被問到當年是否主動追求太太時，周吉佩說︰「其實係港姐追我，講笑啫！我係2009年透過朋友聚會認識我太太，最重要我哋兩個係同一日生日，唔一齊唔得。揀番呢日結婚？有諗過，但我唔想，我鍾意有儀式感，會紀念重要日子。」他回憶跟太太拍拖兩年幾後已求婚，兩人一起第5年時就結婚，至今已一起14年，婚後誕下一對子女。
新歌《Falling for you》是周吉佩的愛情觀，他說︰「MV其中一幕有我同我太太嘅真實故事，當年我第一眼見到我太太喺卡啦OK房，個場有啲暗，又有啲射燈，佢一開門有啲風吹起佢啲頭髮，好有女神feel，我就將呢一幕放入MV，主要係想講『嘩，好鍾意呀』！」周吉佩在節目中透露將於今年12月舉行首次個人演唱會，場地暫未能公布，但可容納不少觀眾。他被問到屆時可會騷肌或跳舞時說︰「一定會跳舞﹗至於六嚿腹肌，我仲努力緊，因為有個畫面好想做，就係除咗件衫彈結他，懶係型咁。不過，我都係盡量去做，唔敢肯定，練到就有，冇就畀手臂大家睇。」
