許靖韻（Angela）聯乘服裝品牌，並擔任時裝設計師，設計一系列屬於她的時尚服飾。昨日（20日）服裝正式上架，原本於北京拍攝雜誌的Angela，飛到廣州落舖宣傳，舖外迫滿fans，場面墟冚。
昨日Angela身穿自己設計的粉紅色小背心現身，當人肉生招牌。現場所見，除了不少女Fans課金支持Angela，就連男Fans都穿上由她設計的粉紅色tee及貨車帽，此外，亦有Fans由美國三藩市、台灣、上海及長沙等，專程到廣州瞓身支持。
Angela表示十分喜歡穿小背心，這次設計方向以小背心為主，她說：「雖然自己另一個別名係『小背心』，自己好鍾意着小背心，平時着好多，特別係夏天，屋企有好多好多件小背心。」
首次設計時裝，Angela坦言最大困難是畫圖：「我畫功本身好有限，好多想表達嘅嘢都好難，我用我僅餘畫工展示畀大家睇，再靠大家想像。」由於畫功是「有限公司」，最後她向妹妹求救：「因為設計呢樣嘢，我覺得係好需要畫得好靚，呢一方面我有搵咗細妹幫手。」
