伍允龍今天（22日）到港台出席《奧運第一台》啟播活動，他早前拍戲致左腳受傷，除需要別人攙扶，還自備助行車免再弄傷腳，他說：「因1個月前拍動作戲出意外受傷，好彩冇傷到筋骨，只係左腳有忽肉唔見咗，做咗2個手術，已經拆線好番好多，都差唔多行到，已重返劇組開工，先拍文戲，過多1個月痊癒，再拍打戲。」
伍允龍自揭以往受傷經歷，他說：「已經成身都係故事，曾被安志杰踢裂兩條肋骨，做慈善活動又斷過手。」問經常受傷可覺得自己太搏命？他說：「媽咪會覺得多啲，身邊朋友都會覺得，不過我經常都講，唔係太嚴重嘅，始終都會好番，但拍出來嘅係永遠，有時要少少付出係OK的。」
《九龍城寨之圍城》後令伍允龍人氣急升，他工作量大增，下月有部新戲延遲，好讓他養傷，不過亦有其他工作。問可會到廣州支持舊愛鍾嘉欣開騷？他説：「我冇留意佢開演唱會，如果佢邀請我，我一定會去。」不過他表示知道林峯9月澳門開騷，2人有聯絡傾偈，他說：「林峯都知道我受傷，叫我小心啲兄弟！多謝關心。」問對方開騷可會與幾位城寨兄弟上台獻唱？他笑道：「我唔想佢嘅粉絲走，如果佢有呢個計劃，幫到手一定會，但相信佢都唔使我幫手。」
