羅家英今天（2日）出席新編粵劇《馬湘蘭》發布會時，透露將演出港台劇集，飾演糖尿病患者。家英哥說：「好耐冇拍劇，人哋未必搵我，我亦未必得閒。我成日去內地開工，又做粵劇，又要踢波，最重要係照顧阿姐（汪明荃）。」
汪明荃將在新編粵劇《忠烈楊門》演老角佘太君，她曾表示家英哥不肯教她如何演。家英哥說：「阿姐諗住我會教佢，但我唔贊成佢演呢套戲﹗做開花旦，無端端去做老旦做咩嘢啫！想挑戰自己都唔係咁樣挑戰，唔通人哋叫佢去做花面，佢又做？不過，佢應承咗，冇得駁番我。我只會少少提點，唔好旨意我教，只會鬧交。不在其位，不謀其政﹗不過，我把口都會支持佢。」
家英哥表示做完自編自導自演的新編粵劇《大鼻子情聖》後也想封筆，壓力太大不想寫曲和劇本，所以想拍劇輕鬆一點。他表示下月會去山東踢波︰「因為巴西足球名宿卡卡都會落場。想去合照？唔係，我想扭過佢、攔截飛鏟佢﹗不過，我諗我連佢個影都追唔到。我10月就會去泰國睇曼聯對利物浦元老隊比賽，呢次就真係為咗同足球名宿傑斯、史高斯合照。」
