梁釗峰最近推出新歌《致陪伴我的》，日前於荃灣舉行宣傳活動，活動原定西貢戶外地方舉行，受天雨影響需移師室內。釗峰除獻唱歌曲外，還親手為「峰心粉」（粉絲暱稱）冲咖啡兼合照聊天，期間遇上駐足觀賞的婆婆，婆婆的說話深深打動釗峰以及在場每一位。
活動上，釗峰唱出新歌《致陪伴我的》、《28天》以及《遺憾與遺憾的一切》，吸引逾百人欣賞。台上搭起露營帳篷，擺放了枱櫈，神還原《致陪伴我的》MV場景。「峰心粉」逐一上台與釗峰見面聊天，無論是簽名或是合照，釗峰均有求必應。他說：「本身諗住喺戶外搵個好Chill嘅地方同大家唱歌，點知落大雨，同我拍MV嗰日差唔多。但又係另一種嘅特別，將露營擺上台，大家舒服喺商場共聚，另類嘅開心。」
活動期間，釗峰留意到商場二樓的一位婆婆，對方聽得非常投入，不時揮手和派心，釗峰邀請對方合照，婆婆表現興奮。當她近距離見到釗峰時，激動得握着釗峰的手說：「《遺憾與遺憾的一切》已經好想見你，喺中環街市，但係今次係第一次見到你。由C AllStar年代已經想做你facebook會員，但我唔識搞，你好叻仔呀！」釗峰為婆婆送抱，對方更感動得眼濕濕，全場拍手歡呼。
婆婆隨後上台與釗峰聊天時感性說：「喺我傷心嘅日子，你精神上陪我同行，你嘅歌陪我一齊行落去。我身邊都有情緒唔好嘅朋友，我會同佢分享我認識咗釗峰。」釗峰感觸說：「我都估唔到自己嘅歌可以陪伴到佢，莫名嘅感動，呢個陪伴係雙向。佢哋成日話我啲歌陪伴佢哋，佢哋都係陪緊我。我見住啲歌迷由着住中學校服，到𠵱家帶埋BB上台，仍然追隨緊我嘅音樂，好感恩有佢哋嘅陪伴。」
另外，釗峰將於9月演出舞台劇《遺憾收藏館》，最近忙於排練，但他亦期待舉辦更多與「峰心粉」互動的活動。他說：「之前有個『跟峰跑』系列，可以搞啲『跟峰入戲院』、『跟峰支持小店』活動，我嘅峰心學院（釗峰官方歌迷會）要做嘢啦！」
