即將舉行澳門演唱會的周慧敏（Vivian）日前接受網台節目《絲打圍爐》訪問，自爆靠食瑞士卷減肥。她隨身帶備了兩件瑞士卷︰「因為我要做演唱會啦，所以要減吓肥，呢個係我減肥餐﹗我全日都唔食嘢㗎啦，起身之後食2件，下午2件，帶多2件喺身，餓嗰時就食，每日6件左右，就係我一日食糧。其實我仲會偷食零食，麻辣花生、魚仔花生、黑朱古力，少少啦，哈哈﹗不過，我一日咁樣嘅時候，第二日就食番正餐。我唔係日日都係咁，隔日咁啦，呢個係咁多年來做演唱會前嘅減肥方法，食咖啡卷嚟減肥最有速度。我已經瘦咗啦，已達標，瘦咗4磅！我會刮咗啲cream先食，所以我嘅方法係控制食量，其實係食自己鍾意嘅嘢。演唱會當日，我就只係食兩隻煎蛋，食少少嘢咁，出場前我會加食四匙羹白飯，會非常有力量！」
