林奕匡（Phil）太太李靄璣（Rikko）前晚（23日）誕下兒子Darrien，母子平安，Phil升呢做林爸爸，恭喜恭喜。
Darrien出世時重2.84kg（6.25磅），在入產房前Rikko一直打算順產，但怎料在醫院經過10多小時後開始發燒，Rikko道：「我開始發燒，BB心跳去得好快，冇辦法之下要緊急轉做開刀手術，當時雖然好攰，但我好驚瞓著，瞓咗就見唔到BB，甚至瞓咗以後都唔醒。」Phil當時亦感到驚惶失措，他說：「 我差唔多全程都陪住Rikko，希望畀多啲support佢，同埋分散佢痛楚，但睇住Rikko體溫不斷上升，BB心跳又不斷上升，都愈嚟愈擔心。」
當確定要做手術後幾分鐘，Rikko先入手術室，Phil在外面辦理手續後，隨即進入手術室，Phil回憶說：「當時我望住醫生畀我嗰一張開刀手術嘅風險資料，我突然好驚，人生從來冇試過咁驚，好驚Rikko同BB會有事，但係我知道我入到去，我一定唔可以畀Rikko feel到我驚，我要distract佢（令佢分心），於是我整定個playlist，全部都係我最柔和嘅歌曲畀佢聽。」
當護士告知BB已出世，2人依然緊張，直到聽到BB哭聲才鬆一口氣，Phil隨即幫手剪臍帶。當看到Darrien後，Phil流露慈父笑容，說：「佢同我一樣咁多頭髮，眼仔睩睩就似媽媽。」
Darrien還未有中文名，但Darrien這個英文名字，由Phil想出來，有「Gift（恩賜）」、「Rich（豐盛）」及「Kindly（仁慈）」的意思，Phil說：「Darrien呢個名係對囝囝嘅祝福同期望。其實都考慮咗好耐，想改一個『D』字頭嘅名，之前上網search，參考過過千個名都唔合心水，最後係自己諗出嚟，又幾好聽，上網check完，原來個名嘅意思又咁好，就確定用呢個。」
其實在Darrien出世之前，Phil與Rikko都為小寶寶未雨綢繆準備很多，亦遇上很多驚險事故，好似Phil在Rikko懷孕期間，試過打波拗柴受傷，幸好未有骨裂，痊癒過程亦比想像中快，另外因為Rikko選擇順產，難以預知囝囝的出生時間，早前Phil前往澳門演出，他也擔心撞正囝囝出世，Phil說：「我離港之前幾日，日日都同BB講，要等埋我返嚟先出世呀！結果BB好乖，真係等埋我！」
BB出世了，Phil與Rikko也忙湊仔，不過他們早就有心理準備，Phil說：「因為係有計劃嘅懷孕，心態上我哋都好ready、好期待。我哋一早安排好BB用品、衣服、傢俬等，亦學習點樣餵母乳同照顧BB，𠵱家反而需要學習嘅，就係BB將來嘅教育基金、健康保險同埋醫療保障等。現今世代要好好養育一個小朋友，真係唔容易，都要深思熟慮好好地安排！」
