無綫《中年好聲音》近月不斷鬧出是非，繼第一季的曹敏寶與梁浩銓傳婚外情緋聞、龍婷與已婚丘亞葵爆緋聞而傳被雪藏、支嚳儀被指是「金手指」；第二季參賽者鄭梓浩亦被前女友控訴是「渣男」，更指鄭梓浩的「小四」疑是孫耀威胞妹孫美賢，事件令外界嘩然，孫美賢即時刪除社交平台。
曾參加首季《中年》的何博文與梁凱榳，昨晚（6日）參與慈善演唱會演出。兩人被問到鄭梓浩被舊愛力數渣男行為一事時，何博文直言失望︰「爆咗呢單新聞後，我覺得好失望。我會喺度諗，係咪應該可以做得更好呢？作為公眾人物，應該係可以避忌啲，做番好少少﹗《中年好聲音》呢個舞台係好多人追夢嘅地方，係一個歌唱比賽，發生呢啲事，好似失去咗意義。」
梁凱榳稱只跟鄭梓浩接觸過一次，覺得他性格比較靜。她說︰「可能我唔係佢杯茶﹗佢見到我會叫我師姐，我一額汗，明明佢好早出道，竟然叫我師姐。」對於鄭梓浩被舊愛力數，梁凱榳說︰「我覺得唔好得罪女人。不過，感情係有好多故事，每個人鍾意嘅嘢又唔同，家家有本難念的經，所以唔評論。女方同佢拍咗7年拖，應該係好有感情，發泄一吓都正常。」至於可擔心連番是非會影響《中年好聲音》形象，梁凱榳認為觀眾眼睛雪亮，做好本分就可以。
