謝君豪、魏浚笙（Jeffrey）昨晚（30日）聯同電影《焚城》導演潘耀明、監製江志強接受ViuTV《爆谷一周》錄影訪問。《焚城》將與《破‧地獄》合作推出限量電影套票催旺本地電影市道，謝君豪大讚非常好︰「對觀眾亦係好事，可以睇晒兩齣片，希望大家支持香港電影。呢種方法從未試過，好有趣亦有話題性，將來其他電影可以仿效，大家合作將市道整旺至係最實際。邊部戲會贏？希望係雙贏﹗兩齣戲一齊謝票宣傳？好提議，幾過癮，首先大家要睇晒兩部片先。我會揀同黃子華一齊宣傳，因為我哋比較熟絡，如拍住許冠文會有啲驚。許冠文係我偶像兼一代宗師，我細個時已睇佢嘅電影。」
Jeffrey選擇跟朱栢康一同宣傳︰「我同佢認識，而且我對破地獄儀式感興趣，到時可以問佢練習同拍攝情况。」謝君豪說︰「朱栢康拍電影《濁水漂流》時學過破地獄儀式，已有功底，拍《破‧地獄》應該會得心應手。」談到《焚城》已舉行了多次謝票活動，謝君豪開心表示︰「觀眾話部片好感動﹗其實我每次睇每次都喊，有幾個位好動容。」Jeffrey亦被多場戲感動落淚︰「全港消防車出動救災一幕，我起晒『雞皮』。」
