近日在深圳拍攝劇集《正義女神》的譚耀文（阿譚），昨天（7日）抽空回港參與《歡樂滿東華2024》演出。他說︰「之前推出新歌嗰陣時，接受家燕姐訪問，大家講過話有機會可以合作就好，諗唔到隔咗冇耐之後就收到家燕姐邀請我做《東華》嘉賓，仲話想同我做一part勁歌熱舞，當時一聽到就即時答應，雖然之後要返深圳趕劇，但為善事出力辛苦啲都值得。」
事隔多年再返回TVB表演，阿譚表示心情特別緊張興奮︰「返到去仲見到好多熟悉嘅面孔，感覺特別親切。今次除咗唱歌仲要跳舞，所以喺拍劇途中都來來回回返香港排舞。雖然好耐冇又唱又跳，不過可以做番自己最擅長嘅跳唱，又有一種好熟悉嘅感覺。其實喺演出之前，我因為趕劇關係有啲唔係好舒服，好彩都冇影響正式演出時嘅水準，現場見到啲觀眾反應，就知道冇白費工夫。」
昨晚完成演出後，阿譚立即坐車返深圳繼續拍劇。他表示除了電影和電視劇，音樂也是其2025年目標，希望可以在新一年用音樂回饋追隨自己多年的樂迷。
