昨天(4日)一個以評論香港電影的Facebook專頁發文,勁彈今年香港賀歲片,指票房差是合理,惹來有份演出賀歲片《祥賭必贏》的張繼聰留言:「今次係我最後一次睇你嘅page。」再附了一個揮手的emoji。
今天(5日)張繼聰罕有開Ig直播回應事件,他說:「本身唔係一件好大件事,跟住朋友及媒體轉發,發生咗件事咁啦,我自己好少就呢啲事去回覆及講,或者講,頭先一路做嘢,諗咗一陣好唔好回覆,睇到事件小發酵,見到朋友有啲睇法,有一啲嘢我都想講,正如我嘅Topic:『屈住屈住,唔講好似唔係幾好,講咗又好似好煩』,但都係想講。我好多嘢講,如果我打字會打論文,文字有誤差,大家睇字有唔同感受,產生唔同情緒,呢樣係我最唔想,我𠵱家都好平靜,去到底都係睇戲,我都係大家新年時平靜啲。」
阿聰解釋為何有該留言?他說:「先講演員又好﹑我哋電影工業又好,唔使講都知,𠵱家係好唔理想狀態,都唔知仲要行幾耐,但呢個後話。
我哋同一啲影評人關係,我覺得好重要,點解呢?影評人重要原因,因為我哋以前演藝讀書時,都要受訓練點樣成為評論員,其中一個課題我哋要睇好多戲﹑同寫報告﹑學下點樣去睇一套戲,我覺得影評人重要性似導遊,未接觸到電影本身,或者接觸宣傳電影第一浸,需要一啲影評人導讀,睇完後去介紹下從乜嘢角度,切入去欣賞一部電影,我𠵱家講嘅所有大前提,唔係話一定要讚,可以彈嘅,但說到底要明白電影或藝術係好主觀嘅嘢,當所有基本水平達到咗,就去到taste,你好難攞蘋果﹑香蕉﹑西柚同榴槤比較,佢哋唔同,呢啲係taste問題。
如果作為影評嘅你,係有自由去講你嘅taste,係冇問題,我希望有一啲影評係先撇除如果我做咗隻蕉出嚟,一開波你好鍾意蘋果嘅,咁唔使講喇﹗因為根本上你係唔鍾意蕉嘛,但可以拆解畀觀眾聽,呢個人做咗隻蕉出嚟,佢點解要做隻蕉係咁樣嘅呢,過程係咁樣做喎,導致隻蕉最後係肥美﹑定係有少少爛,如果講到過程出嚟,我係最開心,我係恨睇到咁樣影評,即係嗰個人好清晰,佢睇到我哋點做。
當然啦﹗我哋拍一部戲遇好多問題及計算,我哋都知道係會咁樣,但有時顧前顧後,我哋都選擇咁樣,有時希望睇到好嘅睇法,我會記住,下次會再做好啲,我覺得呢樣係重要,只不過係我期望,甚至乎睇開一啲影評朋友,唔介意去你哋節目傾偈,其實我係點拍,我嘅選擇係咁,大家討論下,咁樣未必好或咁樣好啲,你哋話畀我聽,可能觀眾覺得咁樣先好睇。
做戲有樣好玩,係冇標準,就算講全世界演技style,其實都有唔同嘅,表演本身係與時並進,以前大力啲好睇啲﹑𠵱家清淡啲,但去到一段時間重口味好睇啲,隨時間及時代唔同。
今次我留咁嘅言,如果一次過地圖炮,我睇到地圖炮之後,好多憤怒觀眾留一啲比較負面睇法,好似全部戲都唔值得睇,咁當然呢個係另一個Issue,點解會引申到大家有咁多情緒,都有前因後果,作為呢一刻同呢一代,仲努力緊嘅電影人,我哋一定繼續努力做落去,如果真係支持香港電影,唔覺得淨係要讚或彈,真係冇問題,睇完啲Comment話我𠵱家小器及唔接收批評,我想講呢十幾廿年,我接受嘅批評,合理嘅﹑無理嘅,我諗都超乎常人,點會唔接受批評,我覺得批評係好重要,唔好講批評,睇法都好重要,有時我畀錢,我都要進修及學好啲,絕對唔係小器及唔接受批評,如果大家都係同一行,想呢行好啲,可唔可以有另一個方法去導讀,每一個影評人你哋都有Fans,會有人去睇,一啲先入為主睇法,人都係主觀,咁都係會影響。
我自己經驗係,好多人主觀鍾意我或唔鍾意我,都有啲咁嘅情况,所以有咁嘅留言,當然我都要付出代價,收到大量人身攻擊,但唔緊要,我係唔想事件發酵,坦承同大家分享,點解有咁嘅舉動。
有啲朋友都同我講,話:『唔似你喎﹗你好少會講』,再多一個原因係:好多普羅大眾覺得呢一輪好努力做,只不過係一部電影,但喺我眼中,呢個係我哋行業,唔係一套普通電影咁簡單,我哋行業面對緊都嚴峻情况,好多電影從業員都努力改善改變情况,同香港好多行業面對緊一樣嘢,唔係情緒勒案,唔需要,認識我嘅人都知道,我係認真做戲嘅人,認真對待我職業,呢樣嘢唔係講笑,我都算係攞生命演戲,睇到喜劇好好笑都好,唔係臨時行埋去爆肚就可以做到,我自問冇咁叻,背後都要諗好多嘢,度好多嘢,當下睇到咁樣評語,內心會有一啲人之常情,我都仲係人囉,好多人仲好努力,唔想再有任何argue,大家可以心平氣和,我哋拍喜劇都係想大家開心,希望講完後,我都係最後一次講呢啲事,知道大家鍾意食花生,但唔好食咁多,會熱氣嘅﹗
博宣傳?我唔係咁樣宣傳,我同團隊盡力入戲院宣傳,讚我哋嘅﹑唔鍾意都好,打幾個字係真心,多謝入場觀眾,都真係好正,有留言話:『做我哋呢行全部都係poo poo,因為靠自己技藝換錢,唔好縱慣晒,唔值得尊重。』任何職業都係咁,靠自己技能換錢,呢啲comment都正,人身攻擊去到呢個階段,我會記住,睇下幾時變成台詞。
唔鍾意冇問題,呢個係taste問題,我哋好畀心機拍,希望下次你睇到你鍾意電影,希望入戲院睇戲,講完呢段嘢,唔係要你哋鍾意我或唔鍾意我,只坦承咁講好多人努力做電影,我哋同媒體及影評人,其實健康互相幫助關係,我期望每次拍完一部戲,好誠懇謙卑去睇大家點睇,記住下次點樣做好啲,一啲Harsh留言我都會睇,會化成動力,下次當我好攰好辛苦,會諗起呢啲說話,會繼續捱埋去,觀眾睇好多嘢,要求好高,電影繼續做好啲。
內心有種感受,以前得﹑𠵱家都得,但靠每個人努力,唔知幾時改變呢樣嘢,但要開始行。我分享一個成日提醒我自己,我做戲做咗20幾30年,唔計我5歲做戲,愈做得耐愈有自己睇法,作為表現嘅人,一定要有自己睇法,好多人同你講好多嘢,讀書時已經自己講,要建立自己風格,唔會咁易受人哋動搖,因為我最清楚我嘅價值喺邊度,我自己都係把關最重要嗰個人,我唔會放過我自己,所以我學識做好啲,以前表演上好Harsh,同時間愈做得耐,要提自己謙卑,有時擺自己好高,只會望到頭頂﹑地中海﹑頭皮﹑有啲人冇洗頭,再高啲嘅話只係『一點』,呢個世界係冇嘢;如果講到好低,抬頭望人哋下巴及鼻哥窿,永遠只會聞到人哋呼出嚟嘅氣。
呢個唔係我選擇,我嘅選擇係水平線,從人哋角度去望下呢個世界,你會見到呢個世界就算幾多人都好啦,其實每人都唔同,有佢靚嘅地方,我係願意接受批評,就算唔理性批評及人身攻擊都好,我都受咗好多年啦,誰怕誰呢?希望大家enjoy,得閒睇戲,今次係我最後一次講呢句說話:我唔睇嗰個page,你可以睇,佢唔睇港產片,你可以睇㗎嘛。」