由叱咤903主辦的《903 發 賀歲波》,今天年初八(5日)在車路士足球學校舉行,叱咤903《在晴朗的一天出發》、《口水多過浪花》、《聖艾粒LaLaLaLa》及《強大人Get Set Go》結集足球強人,組成「903 UNITED」出賽。今場賀歲波邀得多位歌手及藝人好友,分別組成「FC3」及「二月五號足球隊」上陣較量,於足球場上展開連場激鬥,與廣大樂迷共賀新歲。《903 發 賀歲波》為7人足球賽,採用單循環賽制,共進行3場比賽,每場賽事30分鐘,每場勝方得3分,負方得0分,賽和各隊得1分,由3支隊伍「903 UNITED」、「FC3」及「二月五號足球隊」爭奪金、銀、銅牌。
「903 UNITED」隊員包括:林海峰、黃志淙、當奴、傑朱、余德丞、阿強、Jeff、天欣@881、Agent L、香港足球代表陳肇鈞、蔡子濤、陳正勤、陳加邦及鍾景恆,並由丘建威擔任教練。
「FC3」集合音樂界台前幕後,隊員包括:洪嘉豪、柳應廷@MIRROR、胡子彤、林家熙、吳肇軒、陳家樂、周志文、馬志威、黃溢濠、黃梓僑、李子俊、吳家偉、鄭敏、文國駿及香港足球代表蘇宸褕(灰熊),並由陳偉豪擔任教練。
「二月五號足球隊」網絡成軍,發揚足球精神。隊員包括:YanTing 周殷廷、許賢、米爺、朱Mic、蘇致豪、贊師父、近南哥、文Sir、Mario Hau 孝仔、Ern9、含爺、狼少、良少、阿 J、雞翼、香港足球代表范俊業及顏卓彬,並由陳浩然擔任教練。賽事由馬啟仁(Keyman)現場評述,吳兆庭及譚伯得擔任裁判,並邀得一眾樂迷到場力撐。
首場賽事由「903 UNITED」對戰「FC3」,「903 UNITED」隊長林海峰、香港足球代表陳正勤及陳加邦各入一球,以3比0大勝「FC3」。第二場賽事由「二月五號足球隊」對戰「FC3」,輸了首仗的「FC3」,由洪嘉豪及黃梓僑各入一球,以2比0取得勝利。第三場賽事由「二月五號足球隊」對戰「903 UNITED」,香港足球代表顏卓彬為「二月五號足球隊」先入兩球,余德丞施展帽子戲法,連入3球,陳加邦再入1球,「903 UNITED」以4比2反勝。最後,「903 UNITED」贏得《903 發 賀歲波》金牌,銀牌及銅牌則由「FC3」及「二月五號足球隊」分別奪得,不過余德丞則勇戰受傷,事後余德丞在Ig限時動態寫道:「都係落一下地啫,不過都好開心,但今晚冚被都痛,聽日都射波先。」
在第二場賽事「FC3」對戰「二月五號足球隊」,洪嘉豪踢入致勝一球,賽後指:「守龍嗰個係職業龍門范俊業哥哥,細細個已經聽阿爸講范俊業有幾勁,今次有機會同范俊業踢波,我仲入咗個legend波,都覺得自己成為一個legend,真係好開心。上次903 AllStar足球賽又輸,今次又輸,希望可以搞多啲大型足球賽事畀我哋報多次仇。」
Jer上次903 AllStar足球賽大玩帽子戲法,Jer今場未能入波,他說:「今場試射咗4、5腳,雖然未能入波,都已經覺得好難得。因為我喺賽前定下目標,就係要入范俊業,但原來真係好難。另外兩隊嘅實力都好強,大家落到場比賽,想贏嘅決心都好強。特別係港超聯球員好犀利,1個扭3個,引晒啲球員過去。今日我哋輸,主要因為太緊張。」
負責踢中後場的胡子彤指:「我今日盡力做防守同埋傳波畀佢哋,第一場發揮得唔係特別好,好多隊友都好少有正式比賽,相對綁手綁腳。第二場就調整好心態,好彩有教練陳偉豪幫手。FC3逢星期六就會練波,想每個星期嘅閒日都可以約一場友賽,我哋真係當一個球會去做,想有恆常訓練同比賽,同埋做school tour。今日係我哋FC3成軍後首場公開比賽,今日嘅表現係100分,因為第一次同大家見面,心態其實好好,而球技就會繼續努力練好啲。」
林家熙擔任FC3隊長,他說:「今日嘅表現未如想像,畀自己70分,太多顧慮。Jan 哥哥(林海峰)超勁,佢喺比賽中會隱形咁,但突然又會出現,以為佢踢緊職業。之後我哋FC3想報7 人或11人聯賽,球會要交會費,會keep住練波,仲希望去到唔同嘅中學踢school tour,拉近同中學生嘅距離。」吳肇軒指:「其實我係初次接觸足球,今日無大失誤已經好開心,兩隊都比我哋想像中強。」