「歌神」張學友上月迎來第1000場個人巡迴演唱會，惟早前學友在廣州舉行《張學友60+巡迴演唱會》，因身體不適取消3月7日至3月9日的3場演出，是繼上海、台北及杭州後，第4次因身體不適取消巡唱場次。
張學友前晚復辦廣州演唱會，雖然狀態未完全康復，演唱期間還不停抹鼻水，甚至揩落條褲，又用手巾擤鼻涕，有網民笑稱「沉浸式觀看帥哥擦鼻子」，亦有網民笑言學友有幾首歌是「傷風版」，不過學友依然落力演出兼載歌載舞，絕無欺場。
學友在台上跟廣州歌迷打招呼，並自認狀態「麻麻哋」，他自嘲聲線「性感」，當晚演出不是真正的張學友，而是傷風版的張學友，他說：「大家都知上個禮拜取消咗3場演唱會，聽到我把聲咁『性感』，到目前為止我都係大傷風，上個禮拜我冇聲，冇聲點唱呢？好多朋友同我講，你唔好覺得唔好意思，唔使講對唔住，我想講我講對唔住，唔係因為我病咗，大家都會病，但因為令大家帶嚟好多麻煩，我好抱歉，唔好意思。」
