洪永城（Tony）與太太梁諾妍（Inez）育有大女「Sir Face」靖嵐（Amber）及細女「Sir Nose」靖愉（Beryl），兩姊妹樣子也似足爸爸。Beryl前天（21日）一歲生日，洪永城夫婦帶同兩個寶貝女到主題樂園慶祝，兩人更啜爆Beryl面珠。
梁諾妍說︰「3月21日，我的最最最可愛佛妹1歲啦﹗家姐1歲時去Disney，阿妹都一樣~ 早上工作後就衝入去，仲喺Disney Explorer過咗一晚。2位小朋友玩得好開心，我哋都玩到好盡興，盡興到咩叫攰都唔記得啦！佛妹豬，阿媽祝你繼續佛系開心食得玩得瞓得，同2位家姐溫馨快樂，就好似你個中文名洪靖愉，愉愉快快。日日都啜爆你，好愛好愛好愛你﹗」梁諾妍取笑細女的樣子已比家姐更似爸爸，她說︰「佛妹進化史，樣子已經超越了Sir個face，比Sirface更Sirface的Sirface，究竟是點做到的。」
洪永城則表示︰「佛妹一歲喇。今日帶你睇咗煙花、見咗公主，希望你嘅人生都似迪士尼咁，有冒險、有奇蹟和懷着善良永遠相信魔法嘅心！祝你平安長大，你好幸福，我都好幸福。生日快樂Beryl﹗」
