現年74歲﹑有金牌經理人之稱的黃柏高（Paco），於2020年6月離開太陽娛樂前，已變得低調，行內傳他失勢，亦傳他患上喉癌。今年，他加持網上帶了7年老虎面具唱歌成名的老虎歌皇，為其打造及拍攝AI製作MV，推出首支自家創作派台歌《上帝話事》。
Paco高調回歸廣東歌，接受商台《星光背後》訪問。談到抗癌10個月，Paco說：「驚！諗住自己玩完！」再簽老虎歌皇，作爲經理人面對過的人情冷暖 ，他說：「無唔開心，因為我都係咁！」Paco還談人生遺憾及驕傲，一概與藝人無關。
Paco離職太陽娛樂前，已傳健康出事，直到今年他才承認曾患癌。節目中，他於2019年7月發現病徵：「嗰時好惡劣，咳得好緊要，痰又帶血。以前我飲酒，一個星期飲醉8晚，成日以為醒唔到，到發覺出現問題，先發覺真係會死。當時驚㗎！我諗住玩完，但都要接受。我覺得係自己攞嚟，之前實在太瘋狂。」
之後10個月，Paco接受化療及電療：「心態係要接受，電療化療過程好辛苦，化療係打啲毒藥入身體，好難形容（辛苦）畀你知，係遇到好醫生，好留意我反應，反應係會好極端，但要面對，希望大步檻過。」
復原後，Paco至今仍要定期檢查，但從前起居飲食習慣已徹底改變：「我唔敢飲酒啦，以前我認為酒係生命之水，帶畀我無窮作戰能力，但𠵱家先知，真正生水係清水。」問抗癌情緒低落時，有否作最壞打算，Paco卻說：「最壞打算？都係醒唔到啫，最緊要面對現實，解決問題，克服困難係要堅持，况且我仲有目標，仲想做音樂同拍電影，呢啲目標都支持住我。」
先後經歷華納、正東、金牌等高峰，Paco於2012年雄心壯志加盟太陽娛樂，惟到中期公司開始減產音樂，不少當紅歌手如薛凱琪等先後離巢，有傳Paco失勢被安排專注電影發展，問Paco身在太陽娛樂時期，做音樂是否未如從前得心應手？他說：「係時代唔同咗，或者聽到隻跌倒錢的Demo，最終跌唔到錢都無法，當時無辦法，要集中做電影，要全心全意，唔係想像中咁易，係難以兼顧，作為經理人，我都疏忽，可以咁講，我兼顧唔到咁多問題。」
問Paco怎樣看待從娛樂圈半世紀以來的人情冷暖，他說：「人情冷暖好正常，今時今日，我態度都係人哋肯幫我，我非常之感激；人哋唔幫我，亦應該，要有自知之明。」問到有沒有藝人從前關係很好，而在他失勢時保持距離，Paco說：「唔會唔開心，因為我都係咁，我都會見利忘義嘛，不過大家睇唔到啫。」
近年，年過70的Paco再創立天狼星影業娛樂，再從事電影、音樂及經理人業務，被問及人到某年紀經歷一場大病，有沒有計劃退休？Paco說：「如果退休，只有等死一個目標，但我唔想死住，仲有幾個目標未完成，等我完成我啲目標先，就係推動動作電影，帶出新動作演員，繼續製作打動到人的音樂。」
至於家人有否要求他休息多些，多些時間陪家人，他說：「𠵱家我好早7點瞓，以前都係7點，不過就瞓喺街，𠵱家減少好多應酬，家人都明有工作動力支持我係好緊要。」回望前半生，問Paco人生最大遺憾，他說：「遺憾好多，飲醉太多，亦錯誤灌輸飲酒或溝酒模式，係錯晒亦禍害年輕人，我係罪無可恕。」
至於什麼事令他最引以為傲，Paco的答案，也與藝人無關，「我最叻的地方，就係聽日！過去已經過去！我會繼續努力做到好成績。」
