再為無綫藝人發聲 寄語監製勇於嘗試 汪明荃:唔好用來用去嗰幾個人

文章日期:2021年05月28日

【明報專訊】無綫節目《好聲好戲》播出以來口碑不錯,參賽藝人表現備受讚賞。前晚陳自瑤以大熱姿態勝出,可以入總決賽,她激動爆喊說:「我同老師講,無論今次入唔入到決賽,都希望藉今次比賽呢幾個回合,對得住自己,對得住老師。」

主席評判汪明荃除大讚參賽藝人表現出色,還語重心長說:「同各位監製講,唔好用來用去都係嗰幾個人,應該畀多啲機會其他藝員同事,因為佢哋可以發掘嘅地方真係有好多,唔好幫我哋藝員定型,唔好成日一味叫佢哋做死某一種角色,唔單止藝員演到悶,觀眾都睇到悶。我哋TVB仲有好多藝員同事,我相信佢哋每個都願意嘗試,每一個都有可能性,各監製,認真考慮一下我意見。」

爭總冠軍 難度升級

除陳自瑤入圍外,馮盈盈與張振朗一同躋身總決賽,屆時要接受兩項考驗,包括與專業評判團合作,為經典劇集配音,聲演比自己較成熟的角色,考驗配音及情感表達能力。馮盈盈聲演《巴不得媽媽》的汪明荃;張振朗聲演《鐵馬尋橋》的林嘉華;陳自瑤聲演《溏心風暴之家好月圓》的米雪。

第二項考驗,馮盈盈與張振朗、陳自瑤合作聲演一段經典粵語片的片段,看誰更亮眼,得到評判喜愛,成為傑出聲演總冠軍。

娛樂組

相關字詞﹕每日明報-娛樂